نصائح لعملائنا

ممنوع مكاتب المحاماة

ليه الناس بتخاف تأجر للمحامين؟
فيه فكرة غريبة منتشرة عند بعض ملاك المكاتب الإدارية:
"ما تأجرش لمحامي... هيقعد في المكتب، ومش هيدفع، ولو حبيت تطلعه هتدخل معاه في ماراثون قانوني... وهتخسر!" والمكتب هينتقل للورثة عنده كمان ...
طب نسأل صاحب الفكرة دى :
" حضرتك حصل معاك كده قبل كده؟"
يقولك: "لأ... بس واحد صاحبي قالي! سمعت من فلان
عند حضرتك مصدر للفكرة غير قريبك صاحبك ..لأ
يعني دخلنا رسمي في مرحلة "قالوا وقولنا وسمعت وسمعنا '' وحق ملوش صاحب ،،
الحجة الأشهر لمروجى الفكرة دى
"ده راجل قانون... يعني لو حب يزوغ، مش هتعرف تطوله." وأهل القانون أدرى بيه والكلام ده
وكأن المحامي ده هو سوبر مان القانون ومافيش غيره في مصر! أو هو اللى مخترع القانون تفصيل على كيفه ''
أو عامل قانون مخصوص بينه وبين حضرتك عشان ميدفعش ليك فلوسك''
طيب حضرتك لما مستأجر تاني يبهدلك أى مستأجر نشاط غير المحامى ، أول حاجة بتعملها إيه؟
بتروح لمحامي!
يعني المحامي الوحش بنروحله عشان يطلع الوحش التاني؟!
طيب إيه رأيك بقى إن احتمالية إن مستأجر غير المحامى يتعثر أو ميدفعش ليك أعلى من احتمالية إن محامى ميدفعش ،،
أنا عن نفسي مأجر لمكتب محاماة من سنين
الراجل ملتزم جدًا، بيدفع الإيجار قبل معاده بيوم أو حد أقصى فى موعده منبه فعلاً
الحقيقة إن رجل القانون عارف إن أي هفوة قانونية ممكن تكلفه سمعته وشغله، فبيبقى أحرص واحد على الالتزام
آه طبعا كل مجال فيه الكويس والوحش، بس بلاش نعمل من الاستثناء قاعدة، ونخلي مكتبنا "منطقة محظورة للمحامين"
''الدنيا بتتطور حوالينا ورغم كده في قناعات مزروعة جوا العقل الباطن ملهاش أى سند أو أصل من العقل ''
يا جماعة، كل مهنة فيها الكويس والمش كويس...
بس بلاش نحكم على الناس من المسلسلات، أو من "قصة صاحبي اللي كان عنده جار محامي طلع بيخوف".
#مكاتب_ومقرات

اهمية المكتب الادارى

بخلاف ما هو متعارف عليه ف المكتب الادارى مش مجرد مكان موجود فيه شوية كراسى وأوراق
بالعكس مكتبك الادارى هو مركز القيادة هو القلب أيوه قلب شركتك
مكان تجمع موظفيك مكان مقابلتك عميلك واجهتك وشكلك العام قدام منافسينك وعملائك
وبالتالى هو مش مجرد كراسى وشوية أوراق وان كان ده بالفعل موجود
تخيل لو العميل جالك لاتمام صفقة وكان مكتبك مبهدل او غير منظم او موجود فى مكان مش كويس وموقعه غير جيد
كل ده بيأثر فى قرار عميلك جوا عقله الباطن
وهنا بيقرر هل الشركة دى هى الخيار اللامثل ام لا
أهمية اختيار مكتب ادارى وده بيكون من خلال الاجابة عن الاسئلة الاتية
طبيعة نشاطى ايه
شكل عميلى
من هنا تقدر تحدد المكان المناسب ليك
وتقدر تحدد الخيار المناسب
مكاتب المحاماة والمحاسبة مختلفة عن مكاتب وشركات المقاولات والتشطيبات واللى بدورهم مختلفين عن انشطة التدريب مثلا واللى مختلفين كذلك عن شركات زى السمسرة وهكذا
كل نشاط ليه طبيعة عمل مختلفة وبالتالى مكتب بمواصفات مختلفة
من خلال خبرتنا قدرنا نوفر مكاتب ادارية لكتير من الشركات والانشطة الادارية بأفضل المواقع والأسعار

نتمنى نساعدك ونوجهك الخيار الصحيح

كيفية تقييم العقار

معايير التقييم العقارى
و كيفية حساب القيمة السوقية الفعلية للعقار :
١ -حساب التكلفة لعقار مماثل قائم وفقاً للسعر الآن والأخذ في الإعتبار نسبة الإهلاك
٢-البيوع المقارنة قيمة العقار بناء على عقار آخر مشابه ليه مباع
٣-رأس مال الدخل وفيها يحدد السعر بناء على العائد على الإستثمار والتنبؤ بالدخل والنفقات المستقبلية
الطريقة قائمة على تحويل الدخل المتوقع مستقبلاً إلى رأس مال
الطريقة الأدق هى حساب التكلفة بس محدش بيمشى بيها
طريقة البيوع المقارنة ممكن تكون خاطئة لو قارنت ب عقار مسعر أعلى من قيمته
طريقة حساب العائد قد تكون غير دقيقة ومبالغ فيها

مكتب ولا محل

السلام عليكم من وجهة نظر حضرتك أيهم أفضل لو هدفى التأجير والعائد الشهرى ... مكتب ولا ..محل

عليكم السلام ورحمة الله
وجهة نظرى الأفضل هو المكتب للأسباب التالية
1 جحم الشريحة اللى بتحتاج مكتب أعلى من حجم الشريحة المحتاجة للمحل (قانون العرض والطلب)
لو عندنا عقار وليكن فى شارع فيصل هتلاقى محلين وهتلاقى أضعاف الرقم ده مكاتب

2 الوقاية ومواجهة تقلبات السوق
سعر الايجار للمحل أعلى من المكتب وده معناه ببساطة فى حالة أى تقلبات فى السوق لا قدر الله مستأجر المحل من الصعب استمراره فى دفع قيمة الايجار بخلاف المكتب ممكن المستأجر يستمر فترة أطول طالما القيمة أقل

3 سهولة التأجير المكتب ممكن يتأجر لأنشطة ومجالات وشركات متعددة بخلاف المحل اللى موقعه بيفرض نشاط محدد

4 المكتب قابل للتجزئة والتأجير لغرف وأكثر من نشاط

وبناء عليه من وجهة نظرى المكتب أفضل من المحل للاسباب السابق ذكرها

مكاتب ومقرات مكتبك عندنا

قبل ما تشترى خلى بالك

إشتغالة خلى بالك منها
لو رايح تشترى مكتب إدارى مؤجر
وبيجيب عائد شهرى
وطبعاً بناء على العائد بيتحدد سعر المكتب بيع وشراء
وهنا حابب أقولك متنخدعش بالأرقام اللى بتسمعها لإن الكلام سهل
سهل أقولك عندى مكتب إدارى مؤجر ب ٣٥ الف على شارع فيصل
وعشان بيجيب الرقم ده المالك طالب فيه مبلغ خرافى والعقد مبيكدبش المكتب بالفعل مؤجر بالرقم ده
وهنا قبل ما تفكر تشترى محتاج تتأكد من حاجتين بعيد عن عقد الإيجار اللى هو بالمناسبة مجرد ورقة ضمان حقوق مش أكثر
محتاج تتأكد من حاجتين
النقطة الأولى هل سعر الإيجار هناك وصل للمبلغ ده
ولو حد بيدفع المبلغ ده هل بيستمر ولا شهر اتنين وبالسلامة
والنقطة التانية نوعية الشركة المؤجرة هل شركة قائمة بالفعل ولا حد داخل يجرب حد معندوش خبرة وارد يدفع الأرقام دى بخلاف شركة قائمة وعندها موظفين وليها حجم شغل كبير الشركات دى بتدفع في المكان المناسب مش بتدفع وخلاص وحتى لو أجر مكان مبالغ في ايجاره مش بالسهل ينقل منه
متنخدعش بالأرقام خالص ولا تجرى ورا العائد الكبير
العائد المتوسط المستمر أفضل
ونصيحة من قلب السوق الطمع بيمحى البركة وبركة الإيجار إنه يجى في ميعاده وإن المستأجر يلتزم معاك في دفعه

امتى عميلك يشترى منك

العميل مبيشتريش منك عشان شكلك حلو أو طريقتك حلوه .. دي عوامل مساعدة ليك عشان تقنع العميل بشكل أحسن ..
العميل بيشتري منك لما .. تسمعه كويس وتتفهم ظروفه ..
لما تختار معاه المنتج الأنسب ليه ..
لما يحس إن همك هو إنه يحقق مصلحته .. مش إنك تبعله أكبر إختيار عشان تقبض أعلى عمولة ..
لما تطمنه من نتيجة قراره .. وإنه هيحقق أكبر مكسب دلوقتي وبعدين ..
لما تحل إعتراضاته بهدوء من غير ما تتعصب عليه ولا تفرض عليه رأيك ..
لما تتابعه بإحترافية من غير زن .. ودايما بتقدمله قيمة ومعلومات واختيارات أفضل ..
والأفضل بلاش المتابعة من الأساس
لما يقدر يوصلك بسهولة .. ويكون التواصل بينكم لطيف من غير رسايل مش مفهومة في كلامك ....
متبعش للعميل .. ولا تشتريله .. لكن اشتري معاه
يعني إيه؟
يعني متبعش إنك تزقه للشراء في إتجاه مصلحتك
ولا تفرض عليه إختياراتك
لكن خد بإيده خطوة بخطوة طول العملية الشرائية بتاعته وبالتالي تشتري معاه .. لإنك مستشاره المؤتمن الي يقدر يثق فيه